حاجتنا لعجبن الرغايف (سبيسيال و الفورص) و ضفت ليه نص كاس د الزيت و وحدة د الخميرة د الحلوى و مليحة و 2 معالق كبار د سنيدة و وحدة قاني و الما دافي باش عجنت من بعد درتهم بحال يلا غادي نصاوب الرغايف و خليتهم يطلقو و غادي نحتاجو الزيت و الزبدة للتوراق
في هذه الأثناء دزت باش نوجد التفاح و لاكريم باتيسيير
في لكريم
درت 3 البيضات مع شي 2 معالق كبار ديال سنيدة و معلقة كبيرة ديار مايزينة و 1/2 لتر حليب درت الحليب فوق البوطة مع لفني و خلطت القادير الأخرى كل من بيض و سكر و مايزينة ملي فاض الحليب بديت نخلط بشوية بشوية مع باقي العناصر الأخرى و أنا كانحرك بالزربة باش ما يطيبش لنا البيض و درتو فوق البوطة مع التحريك المستمر حتى يعقد كايولي بحال لي فالصورة
نقيت شي 6 د التفاحات و عصرت عليهم نص حامضة
قطعتهم رقاق بحال لي فالصورة و خلطتهم مع لاكريم باتيسير
بديت نطلق الرغايف عاديين و نورق بالزبدة بحرارة المطبخ
و نطويها بحال الرغيفة مربعة و حتى كملت الكويرات لي عندي بديت بالولى لي طلقات و سرحتها شوية و درت في الوسط معلقة كبيرة من خليط لاكريم و التفاح
و طويت الجوانب بحال لي فالصورة
كملت الرغيفات لي عندي و دهنتها بشوية د الزبدة و دخلتها الطيب و ها النتيجة
بالصحة و الراحة
ليست هناك تعليقات:
إرسال تعليق