بريوش بالكريم باتسيير على شكل وردة

المقادير

بالنسبة للعجين غدي نحتاجو له 
500 غ دقيق
175 غ ماء دافئ
75 غ سكر
75 غ زبدة بلا ملح فحرارة المطبخ
40 غ خميرة
10 غ ملح
بيضة
5 غ محسن ( لي عايشين فاسبانيا غاديين تلقاوه فميركادونا ديرو 2 ساشيات بويض و 2 موف , لي ماعندهمش المحسن ديرو م.ك خل و عصير حامض مخلطين كبديل كنت شفتها عند المشرفة ريم 2012 جزاها الله كل خير )للحشوة كريم باتسيير غاديين نحتاجو ليها
500 مل حليب
100 غ سكر
40 غ مايزينا
4 بيضات
قبصة ملح
فاني
(انا استعملت غير نصف المقادير لان كان عندي شويش ديال الكريم باتسيير فالثلاجة )للتزين
بيضة للدهن
2 م.ك حليب
2 م.ك سكر

1- ناخدو كسرونة و نوضعو فيها جميع المقادير و نديروها على عافية متوسطة حتى يعقاد الخليط , نزولوها من فوق العافية و نفرغوها فإناء نغطيوها ببلاستيك غذائي و نخليوها على جنب تبرد .








2- بالنسبة للعجين نخلطو جميع المقادير ماعدا الخميرة و الماء نعملو النصف و نخلطو نزيدو الخميرة و نبداو نزيدو فالما شويش بشويش حتى تجمع لينا العجينة (الما ممكن تحتاجو اكثر او اقل على حسب نوعية الدقيق و بالنسبة للخميرة انا ستعملت اليابسة درت 15 غ إنما تعطلاتلي فالتخمار فمن الاحسن تستاعملو الطرية ) العجين لازم يكون لين و ماكايلصقش فاليد و بلا مانحتاجو ندلكوه غير تجمع و صافي , نغطيوها بزيف و نخليوها ترتاح 10 د .




3- نشكلو العجين كويرات فكل كويرة تقريبا 50 غ نغطيوهم و نخليوهم يخمرو حتى يضاعف الحجم ديالهم .


4- نديرو كريم باتسيير فجيب الحلواني , نطلقو الكويرة تقريبا 14 سم فالطول ندهنو الجناب بالبيض و نديرو كريم باتييسر فالويط و نلفو العجين على نفسو على شكل حريبل , نقطعو 5 تقطيعات بلا مانوصلو الاخير وندوروها على شكل دائرة و نبداو نفتحو فكل طريف حتى نحصلو على شكل وردة , او ممكن نبداو نفتحو فالطريفات و فنفس الوقت لفوها حتى نحصلو على شكل وردة و الصور توضح ليكم اكثر .










5- نوضعو الوريدات فلاطة ملبسة بورق السولفيريزي و نخليوهم يخمرو حتى يضاعف الحجم ديالهم . من بعد نعمرو كل وردة فالوسط بكريم باتسيير ندهنو بالبيض مخلط مع شويش ديال الحليب و نزينو باللوز ايفيلي (اختياري) و ندخبوهوم الفران حتى يتحمرو و ياخدو لون ذهبي.




6- نخلطو الحليب مع السكر و نديروه يسخن فالميكروند حتى ذوب سنيدة و نخليوه يبرد شويش , منين يخرج البريوش من الفران ندهنوه بالخليط و نخليوه حتى يبرد عاد نزولوه من اللاطة ممكن تعوضو خليط الحليب و السكر بالناباج .


وها البريوش واجد هشيش فحال القطن و مذااااق غزااال




نقدموه مع قهيوة او اتاي فالفطور او الكوتي




هادي كنت درتها باافيرميسيل ديال الشكلاط جربتها إنما بيني و بينكم ديال لكريم حسن  ( على فكرة هاد المقادير كتعطي 18 الحبة )

اللهم ادمها نعمة و احفظها من الزوال