كيكة بالكركاع و بوعويدة

المقادير
بالنسبة لمول 18 سم غادي نحتاجو

100 غ شكلاط اسود
100 غ زبدة
3 بوعويدة صغار ( 2 مقطعات طريفات صغيرة او وحدة مقطعة شرائح لتزيين )
م.ك عصير الحامض
2 بيضات
قبصة ملح
60 غ سكر
180 غ دقيق
70 مل حليب
2 م.ك كركاع مهرمش
قبصة قرفة
م.ص خمارة
فاني
لوز ايفيلي للتزيين

1- ندوبو الشكلاط مع نصف كمية الزبدة و نحتافضو به على جنب .
2- نفرقو البيض صفار عالبياض و نطربو ابيض البيض مع قبصة ملح حتى يولي فحال الثلج و نحتافضو به على جنب .
3- نطربو الزبدة مع السكر و الفاني مزيان حتى تولي فحال بومادا من بعد نبداو نضيفو صفار البيض وحدة بوحدة .



4- نضيفو الدقيق مغربل مع الخمارة و القرفة و نزيدو حتى الشكلاط مذوب و الحليب و نخلطو جميع المقادير مزيان .



5- نزيدو الكركاع و بوعويدة مقطعة طريفات صغار نخلطو الكل .


6- نبداو نضيفو بياض البيض شوية بشوية و حنا كنحركو من التحت الفوق بالسباتول من بعد نصبو الخليط فمول مدهون بالزبدة و مرشوش بالدقيق , نزينو بشرائح بوعويدة و اللوز ايفيلي و ندخلوه الفران مسخن على درجة حرارة 175 مدة 45 دقيقة .




7- ناخدو 2 م.ك حليب مع 2 م.ك سكر و نديروهوم فالميكروند حتى دوب سنيدة , غير يطيب الكيك و هو مزال سخون نبقاو ندهنوه بخليط الحليب و السكر منها كيزيد الكيك يفزك و منها كيعطيه البرييو يعني هاد الخليط هو نفس مفعول الناباج .


وها الكيك ديالنا وجد


و هاكيف كيجي من الداخل هشيش و غزاااال و مذاق روعة ههه






اللهم ادمها نعمة و احفظها من الزوال