المقادير :
عجين الخبز أو البطبوط العادية المعتمدة عند كل وحدة
الحشوة :
شوية الكبدة والقلب والكلاوي والشحمة وأنا ضفت كدلك شوية ديال الرية ، لحم بقر أو غنمي ، بصل ، بيض مسلوق ، كتبغي كذلك لوز بلا قشور ومقلي مكانش عندي ، الربيع والتوابل المغربية المعروفة وكدلك على حساب دوق ديلكم ، الحااااار هههه الحار وما ادراك ما الحار بنسبة ليا وبكثرة ههههه
من خلال البحث كتشفت أنه كين لكيستعملهة بلا هاد الدوارة ديال الغانمي ، كين لكيدير غي اللحم ، يعني إلا مكانش بلاش ، حتى أنا على شوية ومكنتش غندرها بالدوارة ، هدشي غي نقستو وصافي ، قولو سرقتو للوليد حيث هو كيتكلف بالشي ولكن عندكم تفهموني غلط ره سرقتو قدام عينه هههههه مع سابق الإصرار
المهم الطريقة سهلا بزاف
نعجنو العجين ديالنا هو الأول ونمشيو نوجدو الحشوة منها نيت يرتاح ، نقطعو كلش طريفات صغار ، نديرو البصلة في مقلة مع شوية الزيت والملح حتى طيح ، ثم نزيدو المقادير لعندنا ، نزيدو العطرية ، الكمون ، البزار ، التحميرا ، سكين جبير ، شوية الخرقوم والحااار والربيع ، نقلوهم ونديرو البيض يتسلق ، وإلا بغينا نزيدو عليها اللوز خاص يكون بلا قشور ونقليوه حتى هو
نرجعو العجين ، نقسموهة على جوج كرات تقريباً مساومة بناتها ، نطلقو الأولى على شكل خبزة ونعمرها بالحشوة ونزينها من الفوق بالبيض واللوز إلا كين .
نرجعو نطلقو الكرة الثانية ونعملوها فوق الأولى ونسدو مزيان الجناب وإلا كانت شي شياطة في العجين نتخلصو منها بالجرارة وممكن نشكلو منها تزيين
نرجعو نخلوها تخمر مرة ثانية وندخلها الفرن الساخن
ههيا وجدات ، إن شاء الله تكون عجبتكم ، أما بالنسبة للمداق منعودش لكم هههههه
السلام عليكم ولا تنسونا من صالح الدعاء
ليست هناك تعليقات:
إرسال تعليق