ساندويشات البانيني غزالين

نبداو على بركة الله ,

للخبز غاتحتاجو :

{قياس 4 سندويشات , الي بغات اكثر تدوبل المقادير }

250 غ دقيق فورص

1 معلقة كبيرة زيت

1 معلقة كبيرة خميرة

1 معلقة صغيرة خميرة الحلويات

1 معلقة صغيرة سكر

ملح حسب الدوق

ماء دافئ



نعجنو المكونات كلها وندلكو مزيان , الى كاينة العجانة احسن ,

ملي تكون عندنا عجينة رطبة , ندهنوها بالزيت و نخليوها ترتاح شوية.

من بعد نقسموها على 4 كرات { بالنسبة للقياس ديالي لي استعملت}

ونحاولو نديروهم على شكل كوميرات صغار كيف ما باين في الصورة, و نخليوهم اخمرو , ولكن ماشي بزاف غي شوية .

وندخلوهم اطيبو على درجة 180 °

غي يشدو ونخرجوهم , خاصهم ابقاو بيضين ولكن طايبين .



نجيو نحضرو الدجاج ديالنا ,

250 غ ديال كفتة ديال الدجاج او لاداند

½ بصلة محكوكة

ضرس ثومة 

شوية ربيع مقطع

1 معلقة كيتشوب

ملح 

ابزار

تقريبا كاس صغير لاشابلور 



نخلطوالكل و نخليوه واحد 30 دقيق ومن بعد نبداو نطيبوه في مقلة { ماتكونش كتلصق} مدهونة بشوية ديال الزيت .

ملي تطيبا لكفتة ديالنا نبداو في تحضير السندويشات,

غا نحتاجو:

مايونيز

خس مقطع

خيار مقطع رقيق

فروماج السندويش

وبالطبع الكفتة و الخبيزات لي حضرنا.



نحلو الخبيزات دبالنا على 2

ندهنو بشوية مايونيز, نديرو الخس مقطع , فوق منو شرائح الخيار كيف قلت تكون رقيقة , ونضيفو الكفتة و فوقها الفروماج

لي كتبغي الكيتشوب امكن تزيد شوية من الفوق



نوضعو السندويشات ديالنا في آلة البانيني " راه دغيا كيتحرو "

و هاهماسندوشات ديالنا واجدين

بالصحة والراحة