بسطيلة الحوت

المقادير
لاشارة هاد المقادير استعملتها ل 3 ناس تغدينا بيها وبقا
ممكن دوبلو المقادير
ورقة بسطيلة
250 غرام كروفيت
250 غرام كلمار
ميرلا كان عندي مورصو استعملتو(ممكن ضيفو صدر الدجاج)
100 غرام شعرية صينية
بواط شومبينيو صغير(الى كان الاسود احسسن)
نصف بصلة بيضاء مشلضة
ربع حامضة مرقدة مقطعة رقييقة
ملح/ابزار/كامون/تحميرة/هريسة/2معالق صوص صوجا
ربييع مقطع/عصا موسى/ثوم/فرماج احمر محكوك
زيت زيتون وزبدة



الطريقة
اولا نقشرو الكروفيت و القشور نديروهم يغلاو فشي كسرونة مع فرع ثوم وورقة الرند
منين يغلا مزيان نصفيو المرق هوا فاش نرطبو الشعرية الصينية و حتا الشومبينيو نوار الى كانو
وممكن نصلقو لفيه الدجاج الى كنا مستعملينو باش يجي منسم



تم نديرو شوية الزبدة و زيت الزيتون و شوية الزبدة و نشحرو السمك كل نوع بوحدو وكل نوع نضيفو ليه التوم و عصا موسى



منين نساليو الحوت نوضعوه فطبسيل



فنفس المقلات كنضيفو البصل و نشحروه منين يبدا يدبال كنضيفو الفطر والحامض مقطع و الحوت وكاع التوابل(متكتروش الكامون)
والحااار تيجي زويين و الشعرية المرطبة و مقطعة و الصواجا و الربييع و عصير نصف حامضة
نخلطو كلشي مزيااان حتا ينسجم و ينشف عاد نطفيو علييه





نخليو الحشوة تبرد مزيان باش متقطعش الورقة عاد نبداو نعمرو الورقة
بالطرييقة العادية و ندهنو بين الورقات بالزبدة مزيان باش تجي مقرمشة
ونرشو الفرماج محكوووك عاد نغطيوها و نسدوها بالبيض



دخلتها للفرن على درجة 200 من الفوق و التحت تقريبا شي 25 دقيقة
ولكن بقاو مراقبينها



منين خرجات رشيت عليها الفرماج محكوك وزوقتها بالحامض
وبالصحة و الراحة