ستيك لداند معمر بالفروماج

هدي واحد الطريقة كنحضر بيها الستيك ديال لداند سهلة وخفيفة 
منحتاجو ستيك لداند يكون رقيق انا درت كيلو الا ربع

نديرو عليهم 2 دانون طبيعي 

نزيدو 2م ك موطارد و2م ك صوجا

نزيدو البزار سكنجبير والقليل من الملح لان الصوجا و الموطارد مالحين وم ك ديال لاعشاب بروفانس الا مكنوش نديرو شوية زعيترة

نخلطو كلشي مزيان 

نغطيوه بالبلاستيك الغدائي ونخليوه في الثلاجة على الاقل واحد الساعتين انا خليتو ليلة كاملة 

هدو هما الاعشاب لدرت خديتهم من مرجان

من يترقدو ناخدو كل ستيكة نديرو فوقها طريف الفروماج انا درت ديال الساندويتش

نلفوها على نفسها

نستفوهم في مول ديال الفرن مدهون بالزبدة ونزيدو عليهم باقي الترقيدة ديال الستيك لبقات لينا مع نصف كاس الماء وندخلوه يطيب في الفران 

منين يقرب يطيب نرشوه بالفروماج المحكوك ونرجعوه يتحمرحتى يدوب الفروماج

هاهو مني وجد وداب الفروماج شكلو كيشهي هههههه

دابة ندوزو للصلصة المرافقة 
في مقلة نديرو شوية زيت الزيتون وبصلة مشلضة رقيقة مع الملح ونشحروهم

نزيدو عليهم حك شامبنيو ونشحرو 

من بعد نزيدو الصوجا مرقدة GERME DE SOJAونشحرو

ثم العطرية البزار وم ك ديال الاعشاب البروفانس او زعيترة الا متوفراتش

نشحرو كلشي مزيان وفي الاخير نزيدو يااما حك ديال كريم فريش او 2 حكاك دانون طبيعي انا هما لدرت ونخلطو مزيان وهاهي الصلصة ديالنا واجدة 

نقدمو الطبق ديالنا مع شوية الروز مصلوق ومشحر مع شوية الزبدة والملح والبزار او مع العجائن 
وبالصحة والراحة 




اللهم ادمها نعمة واحفظها من الزوال